काय उरावं काय सरावं

काय उरावं काय सरावं
जिवनी आपुल्या काय स्थिरावं
याचा निर्णय आपुल्या हाती
कुणी जावं अन कुणी रहावं

उर फाटूनी माया दावी
दुनियेमधे असे मायावी
मिळती पुष्कळ एकेकाला
वाटे त्यांना.. माया(पैसा) द्यावी

प्रत्येकाचं मन राखावं
त्यासाठी जर मन मारावं
हिच असे जर रीत जगाची
तर मनापरी कधी जगावं

समजून उमजून कधी बोलावं
शब्दांना तोलून उलगडावं
दुखवू नये जर हर एकाला
परखड मत मग कधी मी द्यावं

विरोधातून जन्मली दुनिया
रोज़ दाखवी नवी किमया
घाला मन बुद्धीची सांगड
वेळ का घालवावा वाया

--स्नेहा